Plantun de Prouvènço

Pèr coumpara dos planto d'encò nostre

Berberis aquifolium & Cyperus esculentus

Mahonia

Berberis aquifolium

Berberidaceae

Autre noum : Mahonia.

Noms en français : Mahonia, Raisin d'Oregon.

Descripcioun :
Lou mahonia, escapa de plantacioun, trachis d'eici, d'eila, dins la planuro. Se recounèis eisa à si fueioun que dounon d'èr i fuio de l'agréu Ilex aquifolium, e à si flour jauno que se duerbon à la primo. Fai de fru blu.

Usanço :
Touto la planto èi empouisounanto aleva li fru que soun bon pèr la counfituro. Li bèn faire couire pèr leva l'amarun. La planto nous vèn de l'Americo de l'uba e èi la flour óuficialo de l'Ouregoun. Es uno planto vertuouso contro li malautié de pèu coume lou souriàsi (rusclo de racino) e la raumido de pèu (egzema).

Port : Aubret
Taio : 0,5 à 3 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Berberis
Famiho : Berberidaceae

Ordre : Ranunculales

Coulour de la flour : Jauno
Petalo : >6
Ø (o loungour) flour : 6 à 10 mm
Flourido : Printèms

Sòu : Ca
Autour basso e auto : 0 à 120 m
Aparado : Noun
Mars à mai

Liò : Bos fres - Baragno - Pinedo
Estànci : Mesoumediterran à Mountagnard
Couroulougi : Óurigino Americo dóu Nord
Ref. sc. : Berberis aquifolium Pursh, 1814 (= Mahonia aquifolium (Pursh) Nutt., 1818 )

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.